ផ្ទះក្នុងបុរី មានរឿងពិត ៥ យ៉ាង ដែលអ្នកលក់មិនដែលប្រាប់

បើអ្នកត្រៀមចិត្តទិញផ្ទះបុរី ចូរឈប់ស្រមៃពីផលចំណេញហួសហេតុ ហើយរៀនទទួលយកការពិតទាំង ៥ នេះសិន មុននឹងសម្រេចចិត្តទិញ។

១. ការចំណាយមើលមិនឃើញប្រចាំខែ
ពេលទិញ អ្នកគិតតែពីថ្លៃផ្ទះ និងការបង់រំលស់ធនាគារប្រចាំខែ ប៉ុន្តែពេលចូលនៅជាក់ស្តែង ការចំណាយប្រចាំជាច្រើនចាប់ផ្តើមចូលមក៖
• ថ្លៃសេវាគ្រប់គ្រងបុរី (Management Fee) & សន្តិសុខ៖ គិតចាប់ពី $15 អាចរហូតដល់ $100/ខែ អាស្រ័យលើទំហំផ្ទះ និងប្រភេទបុរី។
• ថ្លៃសំរាម ភ្លើងបំភ្លឺផ្លូវ និងថែទាំសួន៖ ថ្លៃទាំងនេះមិនមែនបង់ម្តងចប់ទេ គឺត្រូវបង់មួយជីវិតដរាបណាអ្នកនៅរស់នៅទីនោះ។
• ថ្លៃប្រើប្រាស់ក្លឹបហាត់ប្រាណ ឬអាងហែលទឹក៖ បុរីខ្លះមិនរាប់បញ្ចូលក្នុងថ្លៃគ្រប់គ្រងទូទៅឡើយ គឺត្រូវបង់លុយរាល់ពេលចូលម្តង ឬបង់ប្រចាំខែបន្ថែម។

២. តម្លៃទីផ្សារកើនឡើងយឺត និងការត្រៀមចិត្តអាច «លក់ខាត»
នេះជាចំណុចឈឺចាប់បំផុតរបស់អ្នកទិញផ្ទះបុរីទុកលក់យកចំណេញ!
• ហេតុអ្វីបានជាផ្ទះបុរីឡើងថ្លៃយឺត? ផ្ទះបុរីរួមបញ្ចូលនូវថ្លៃសំណង់ខ្ពស់។ ដីអាចឡើងថ្លៃ ប៉ុន្តែសំណង់ផ្ទះចេះតែចាស់ និងធ្លាក់ថ្លៃទៅតាមពេលវេលា។
• គូប្រជែងធំបំផុតរបស់អ្នក គឺម្ចាស់បុរីខ្លួនឯង៖ ពេលអ្នកចង់លក់ផ្ទះចេញវិញ បុរីនៅតែបន្តសាងសង់ដំណាក់កាលថ្មីៗ ជាមួយការផ្តល់ប្រូម៉ូសិនទាក់ទាញ ដូចជាបញ្ចុះតម្លៃ ឬបង់រំលស់គ្មានការប្រាក់។ អ្នកទិញក្រោយៗនឹងរត់ទៅទិញផ្ទះថ្មីពីបុរីជាជាងទិញផ្ទះបន្តពីអ្នក។
• ត្រៀមខូចចិត្ត៖ បើអ្នកត្រូវការលុយបន្ទាន់ អ្នកត្រូវត្រៀមចិត្តកាត់ខាត ឬលក់ស្មើថ្លៃដើម ព្រោះទីផ្សារផ្ទះ Resale ក្នុងបុរីមានសន្ទនីយភាពទាបពិបាករកអ្នកទិញបន្តណាស់។

៣. ទិញទុកដាក់ជួល (បើខ្ចីធនាគារគឺអន្ទាក់ធំតែម្តង)
កុំរំពឹងថានឹងយកថ្លៃជួល មកបង់រំលស់ធនាគារឱ្យរួចខ្លួនឱ្យសោះ!
• បុរីភាគច្រើនស្ថិតនៅតំបន់ជាយក្រុង ដែលមិនមែនជាតំបន់ប្រមូលផ្តុំការងាររបស់ជនបរទេស ឬអ្នកមានចំណូលខ្ពស់ឡើយ។
• ផ្ទះទំហំដូចគ្នារាប់រយខ្នងក្នុងបុរីតែមួយ កំពុងប្រកួតប្រជែងរកអ្នកជួលដូចគ្នា។ ជាលទ្ធផល តម្លៃជួលត្រូវទម្លាក់មកសល់ត្រឹមតែ $250 - $400/ខែ ខណៈដែលការបង់រំលស់ធនាគាររបស់អ្នករហូតដល់ $700 - $1,200/ខែ។ អ្នកនៅតែត្រូវដកលុយផ្ទាល់ខ្លួនមកបន្ថែមរាល់ខែ។

៤. បញ្ហាសំណង់ និងការផុតកំណត់ធានា

ផ្ទះមើលពីក្រៅឃើញស្អាតល្អឥតខ្ចោះក្នុងថ្ងៃ Hand-over ប៉ុន្តែក្រោយឆ្លងខែភ្លៀង មួយលើក ពីរលើក បញ្ហានឹងចាប់ផ្តើមលេចឡើង៖

• ដីមុខផ្ទះ ឬក្រោយផ្ទះបាក់ស្រុត៖ ដីបុរីភាគច្រើនជាដីចាក់បំពេញថ្មី បើការបង្ហាប់ដីមិនបានល្អ បរិវេណមុខផ្ទះ ឬកន្លែងចតឡាននឹងស្រុតប្រេះបែកចេញពីតួផ្ទះ។
• ជ្រាបទឹក និងប្រព័ន្ធលូស្ទះ៖ ការជ្រាបទឹកតាមជញ្ជាំងបង្អួច ឬពិដានជាន់លើ។
• ការធានាមានកំណត់ត្រឹមតែ ១ ឆ្នាំ៖ ក្រោយរយៈពេល ១ ឆ្នាំ អ្នកអភិវឌ្ឍន៍នឹងប្រគល់ការទទួលខុសត្រូវទាំងស្រុងមកឱ្យអ្នក ហើយការជួសជុលកែសម្រួលផ្ទះខ្លួនឯងត្រូវចំណាយលុយរាប់ពាន់ដុល្លារបន្ថែម។

៥. ភាពស្មុគស្មាញក្នុងការថែមថយ

ទោះបីជាផ្ទះរបស់អ្នកក៏ពិតមែន ប៉ុន្តែអ្នកមិនអាចចេះតែកែប្រែតាមចិត្តចង់បានឡើយ៖

• បើចង់តដំបូលមុខផ្ទះ ឬសង់ផ្ទះបាយបន្ថែមខាងក្រោយ អ្នកត្រូវដាក់ពាក្យស្នើសុំការអនុញ្ញាតពីគណៈគ្រប់គ្រងបុរី។
• ត្រូវបង់ប្រាក់កក់ធានាសំណង់ (មួយចំនួនតូច)។
• បុរីខ្លះបង្ខំឱ្យប្រើប្រាស់តែជាង ឬសម្ភារដែលកំណត់ដោយបុរីផ្ទាល់ ដែលធ្វើឱ្យថ្លៃជួសជុលឡើងថ្លៃជាងតម្លៃទីផ្សារខាងក្រៅទ្វេដង។